المراجعة الشاملة لهاتف جالكسى Galaxy A30 بعد شهر من استخدامه

من طرف **limooo22** الجمعة مايو 17, 2019 5:18 am

شوف الفيديو من هنا

المقال من هنا
التصميم
موبايل جالكسي a30 بييجي ب وزن 165 جرام و بعرض شاشة 6.4 انش ، بتقنية سوبر اموليد و اللي بتدي جودة صورة فل اتش دي ، الشاشة محمية بطبقة كورنينج جوريللا من الاصدار التالت وكمان مع حامي اضافي للشاشة او screen protector اصلية ملصقة علي الشاشة واللي بتحمي الشاشة من اي خدش او كسر بنسبة كبيرة. كمان بنشوف الكاميرا الامامية اللي علي شكل انفينيتي يو او ووتر دروب نوتش واللي شكلها مميز جدا ومش واخد مساحة كبيرة من حجم الشاشة وفوقه بالظبط بنشوف فتحة سماعة المكالمات واللي صوتها واضح جدا ..

ضهر الجهاز مصنوع من البلاستيك المقوي او البولي كاربونايت او زي ما شركة سامسونج بتحب تسميه ال 3d جلاستيك، و الصراحة هنا انا وجدت بعض المميزات والعيوب اللي لازم نذكرها، ومن اهم ما يميز الخامة دي من البلاستيك انه خفيف جدا ودا بيقلل وزن الجهاز ودا بيخليك تقدر تمسك الجهاز لفترات طويلة من غير ما تحس بوزنه علي ايدك كمان مش بيخليك تشعر بسخونة الجهاز زي الضهريات الزجاج وخصوصا مع تشغيل الالعاب او تشغيل الموبايل لفترات طويلة ولكن عيوبه انه سهل الخدش ويمكن دا يفسر سبب وجود كافر من شركة سامسونج بييجي مع الجهاز . كمان سهولة الكسر مقارنة بالاجهزة المصنوعة من الالومنيوم.

وفي المجمل نقدر نقول ان تصميم الجهاز Premium جدا ومش هاتحس ابدا انك ماسك تليفون رخيص او بفئة سعرية قليلة بل بالعكس هاتشعر بفخامة الجهاز ، كمان شكل الضهرية اللي بيلمع و الانحناءات اللي فيها شيك جدا وهاتخليك تحب انك تمسك التليفون ف ايدك.

الشاشة:

هانشوف قد ايه سامسونج مابخلوش علي التليفون دا ف انهم يدوله احسن نوعية شاشة علي الاطلاق . الشاشة هاتخليك تستمتع جدا بمشاهدة اي فيديو علي الموبايل او اي لعبة تلعبها عليه ، بتعرض لغاية 16 مليون لون مختلف مع نسبة وضوح عالية جدا ودا يخلي شاشة الجهاز دا هي أفضل شاشة في الهواتف الاقتصادية والمتوسطة وهي نقطة تفوق كبيرة على باقي المنافسين.*

الكاميرا :
الجهاز بييجي بكاميرتين اساسيتيين من الخلف الاولي بجودة 16 ميجا بكسل ، بفتحة عدسة f/1.7، والثانية الالترا وايد بدقة 5 ميجابكسل، بفتحة عدسة f/2.2 بزاوية روية 123 درجة واللي هتخليك تاخد صور لمناظر اكبر من الزاوية العادية، مع خاصية البانوراما والـ HDR
وهنا تقييمنا للكاميرتين انهم جيدين جدا وخصوصا مع خاصية الاوتوا فوكسينج و دقة التعرف علي الاجسام وسرعة التقاط الصورة. واخليكم مع شوية صور صورتها بالموبايل الجالكسي a30

ومن الامام بنشوف كاميرا السيلفي بفتحة عدسة f2.0 واللي هاتخليك تاخد صور سيلفي بدقة جيدة جدا في ظروف الاضادة العادية ولكن مع الاضادة القليلة للاسف الصور اللي بتتاخد بكاميرا السيلفي بتفقد كتير من التفاصيل.

بالنسبة لتصوير الفيديو في الكاميرات سواء الاساسية او الامامية بيكون بدقة 1080 بكسل وبسرعة 30 اطار ف الثانية الواحدة.

الاداء
تليفون الجالكسي a30 بييجي بنظام تشغيل اندرويد باي الاصدار التاسع مع واجهة مستخدمOne UI وهي الواجهة الجديدة من شركة سامسونج.

الهاتف بييجي ب معالج اكسينوس 7904 واللي بيشبه السناب دراجون 636 في السرعة والاداء وبشكل عام التليفون بيقدم اداء متميز جدا ولكن بالرغم من كدا فهو مش الأفضل في الأداء في نفس الفئة السعرية لان بيتنافس معاه هاتف ال*Redmi Note 7*المدعوم بمعالج Snapdragon 660 وهو بيقدم أداء أقوى بكتير طبعا ، ولكن بشكل عام هاتف ال a30 يقدم أداء مقبول جدا وسرعة تنقل بين التطبيقات بدون اي تعليق او انك تشوف ان التطبيق لازم يحمل من جديد بال بالعكس التنقل بين التطبيقات المختلفة سلس جدا كمان تقدر تفتح اكتر من ابلكيشن في وقت واحد بدون ما تشعر بأي تعليق ف الجهاز ويمكن الفضل ف دا يرجع للذاكرة الداخلية الكبيرة بمساحة 4 جيجا وعلي ذكر ال المساحة الداخلية لازم نخلي بالنا لو هانشتري الجهاز لان فيه نسختين النسخة الاولي بمساحة داخلية 32 جيجا و اللي بتيجي بذاكرة 3 جيجا فقط و نسخة تانية بمساحة 64 جيجا و ذاكرة 4 جيجا وهي دي النسخة اللي بنعمل عليها الريفيو بتاعنا النهاردة،

أما بالنسبة للألعاب فالهاتف بيشغل الالعاب بصورة مثالية حتى مع الألعاب الثقيلة مثل Pubg واللي قدرت اني العبها مع التشغيل علي هاي جرافكس بدون اي تقطيع ملحوظ ولفترات طويلة وبدون اي سخونة جامدة في الجهاز بال بالعكس الجهاز اداءه عالي جدا ف الالعاب و بطاريته بتستحمل فترة كبيرة مع ضغط العب.

البطارية
البطارية بتاعت الجهاز بتيجي بسعة 4 تلاف مللي امبير مع خاصية الشحن السريع واللي هاتكمل معاك يوم ونص مع استخدام الواي فاي المتواصل وهاتقدر تشحن التليفون من صفر ل 100 ف المية في اقل من ساعة ونص.

الصوت

صوت الجهاز للاسف مخيب للتوقعات الصوت مش عالي و رفيع بعض الشئ ودا لان سامسونج اعتمدت علي سماعة واحدة بس في الجهاز دا .. والحل الوحيد للمشكلة دي هو انك تسمع علي سماعة خارجية ودا يخليك تفكر كتير قبل ما تشتري الجهاز لو انت من مفضلي الصوت العالي في الموبايل. برجاء مشاهدة الفيديو ببداية الموضوع لسماع جودة الصوت بالدقيقة الثامنة.